خضار بكريمة الخفق

المقادير

بصل شرائح

جزر اصابع رفيعه

فلفل رومي اصابع رفيعه

فاصوليا خضراء  

فطر شرائح

اجار ليمون

كريمة خفق

بهارات مشكله

ثوم

زنجبيل

زبده

اول شي نشوح الزبده و الخضار في المقلاه ما عدا البصل والفطر والفلفل الرومي

نترك الخضار تستوي على مهلها بعدها اذا شفتي الخضار استوت حطي الفطر والبصل وحركي بعدها الفلفل الرومي

وبعدها حطي اجار الليمون والبهارت وثوم مهروس و زنجبيل مهروس ونحركهم وبعدها نحط كريمة الخفق ونتركها لحد ما تثقل وتصير غليضه وتقدم وتزين في البصل الاخضر  وانا سويتها مرتين مره في الفطر ومره بالزهره البيضه وكلهم صارو حلوين بس اعذروني الصوره قبل التقديم لان وقت التقديم مافيه وقت اصور

اهم شي هذا شكلها وهي حلوه مع الرز والخبز

جربوها وما تندمون

اليوم كنت مشتهيه اكل شي غريب وبعيد كل البعد عن الاكل التقليدي

عشان كذا دخلت المطبخ وجبت لحم وقصصته صغار بعدها جبة زبده صغيره وشوحت اللحم لين لونه يصير نفس الكاريمل بعده

احط فوقه ماء حار وخليه يطبخ لين يستوي الحم ويتبخر الماء

و اذا شفتي المغلاه مافيها ماء نحط خل تفاح ونحرك وبعدها شرائح البصل ونحرك ونحط البهارات كلها و الملح  والببريكا المجففه   بعدها الفلففل الرومي وشرائح الفطر ونحرك لين يتسبك ونطفي النارواحط زبده ثانيه عشان تنكه اكثر

بعدها نكون مجهزين حلقات مخلل خيار وخس مقصص طولي

وصوص وهو عباره عن ( طحينية سايله او هرده - مايونيز - خردل - شطه حاره و صلصة الفلفل الاخضر )

ونقلي بطاط وبعدها نبداء نصفهم في الصينيه

وجنبها خبز ويسلام سلم توديكم لعالم تنسون فيه معنا رجيم

الجلاش المالح

     الحشو لحم مفروم ونمسك عجينة الجلاش ونقصها حسب الطول الي نبيه ونقطيها بالزبده انا حطيت سمن نباتي بعدين نحشيها

    ونحطها بالصينيه وندخلها على الفرن

ونتركها لين تحمر من تحت بعدين نشغل الفرن الي فوق وبعدها تقدم بسيطه وحلوه وتقدرن تحشينها وتفرزينها

                         والصوص عباره عن زبادي وزيتون مخلل مع الفلفل و capers ونخلطه ونقدمه

وهذا شكل الزيتون و capers

  والشكل النهائي باهناء والعافيه

الكانيلوني السريعه

الطريقة

الطبقة الأولى-- طماط وبصل وصلصة طماط وكتشب ولما تسوينها تكون شوي ثقيله وتصير لين نص الصينيه

الطبقة الثانية -- الكانيلوني  ما نطبخه نخليه مثل ما هو  ونسوي حشوة اللحم المفروم ونحشيها

ونصفها في الصينيه

الطبقه الثالثه-- كوب ماء وثلاث ملاعق دقيق ونحركهم على النار لين تثقل بعدين نحط ثلاث ارباع كوب كريمة خفق ونحركه بعدها تشوفونها ثقلت تحطين ملح ورق ريحان

وتحطينها فوق الكانيلوني

وندخله على الفرن ونشغله من تحت وتتركينه لين يستوي الكانيلوني وتعرفين انه استواء لما تحطين شوكة وتعرفين من قساوته

وبعدها لما تستوي ترشين الموزرلا بس توصي كثري وشغلي الفرن من فوق بس لا تسكرينه الفرن بس لين يذوب الجبن

ويشقر بس ما يحمر عشان ما تصير الموزرلا قاسيه وتخرب طعمتها

أعواد صينية

 

المقادير كيس اعواد صينية  

بهارات الكفته حسب ذوقك هو انا شريتها علبه مزدوجه فستخدمت نص الظرف

بصل ابيض حبه صغيره و بصل اخضر

اربع حبات جزر متوسط

سمنه نباتي  وزيت

فلفل رومي ملح صوص صويا وست حبات نقانق

وصورة الأعواد الصينيه و البهارات شوفوها

الطريقه

نسلق الأعواد في ماء

ونقصص البصله ونحمسها في السمنه والزيت

وبعدين نبشر جزرتين ونظيفهم والجزرتين الثانيات نحطهم حلقات

ونستمر في التقليب

بعدين نظيف الفلفل الرومي والنقانق نكون مقصصينه حلقات

ونحرك بعدين نحط صوص الصوياء وتتبيلة الباربكيو

ونخلط بعدها نظيف بهارات الكفته

واذا استوت الاعواد نظيفها فوق الخليط ونظيف البصل الاخضر

ونحركها على نار هاديه ثلاث دقايق لين الخليط تتشاربه الاعواد وبعدها نقدمها ونرش فوقها بصل اخضر لزينه وصوص صويا

مشخول

   

 المشخول اكله كلها دسم بس شحلاتها تجنن كل النكهات متداخله مع بعض تخيلي البيذنجان داخل على الطماط والبطاط وشويت رز ودجاج طعمه ولا احلا

ندخل على المقادير والمقدير انا احطها على الشيئ الي احبه

وانتي حطي اي شي يعجبك

المهم 00000

5بطاط متوسط حلقات

4 بذنجان حلقات

جزر على كيفك بعد حلقات

طماط حلقات انا حطيت خمس متوسطات

بصله راهيه كبيره نقطعها حلقات

ودجاجه كامله بدون جلد نقطعها حلقات خخخخخخ لا اكذب صغار يعني عشر قطع

ونقلي الخضار الا الطماط والبصل نحطهم بالقدر

ونقلي الدجاج لين يستوي

ونحطهم كلهم فوق البصل والطماط ونحط علبتين صلصه معجون طماط وبهارات الكاري والملح  واجي وشوي صوص الصوياء

ونشغل النار على القدر ونحرك لين الصلصه تتوزع بس انتبعي على الخضار لا تتكسر

ونخليه بس لين كل شي ياخذ نكهه من الثاني

وبعدها نخليه

ونكون سالقين رز وحاطين معه ملح وشوية اجي

بعدها نحطها فوق الخضار والدجاج ونظغط على الرز عشان ما يخرب شكله

ونخليه شويه على النار بعدها نطفي النار ونخليه لين وقت التقديم بعدها نقلب القدر على صحن التقديم وزينيه بالخس والليمون

وتاكلينه مع الزبادي واكيد الشطه بس خلصنا وسلامتكم صحه وعافيه على قلبي

بيتزا بيضاوه

الطريقه سهله وحلوه

العجينه

دقيق كوبين

ربع كوب زيت

ثلاث ملاعق حليب

ملح - سكر

ماء

خميره باكنج بودر

نعجن العجينه في ماء لين تكور معنا بس تكون قاسيه

بعدين نغطيها ونتركها تخمر

بعدها نفردها ونعد الحشوه

وهذا شكلها

الحشوه عباره عن صلصة البتزا الجاهزه او حقت البيت ماتفرق لان ما نظيف الا شوي

نقانق وفطر شرائح

نخلطهم مع بعض

بعد ما نفرد العجينه يكون عندنا شكل بيضاوي

نحط تحت جبن موزرلا

بعدين الحشوه بعدين جبن موزرلا

بعدين زيتون شرائح

بعدها نسكر الاطراف وحتا من فوق

لان اذا حطيناها بالفرن راح تنفتح

يعني لازم تسكرينها

ودخلينها الفرن لين تحمر من تحت بعدين فوق

وبالعافي

وانا اسفه لاني محط مقدار الماء لاني من جد ما اعتمد على مقدار

صوص لكل شي

صوص حلو مع الشبس والفطاير المقليه ومع السلطه ومع البرستد ومع كل شي على قولتهم بتاعت كله

       المقادير زبادي كامل وملعقه لبنه وخردل وشطه وmild ومايونيز نسيت اصوره ونخلطهم ونقدمه

فطاير سريعه

يم يم حلوه بشكل خرافي الطريقه   على الطاير

اول شي نسوي عجينة فطاير بس نخففها يعني تصير معلك شوي مو متماسكه

تجيبنها وتفردينها وتحطين الحشوه والحشوه على ذوقك

بعدين لما تحطين الحشوه بالنص تجمعين العجينه وتخلينها مثل البقشه وبعدين تحطن شوية زيت يعني ربع المقلاه

وتحطين العجينه على الوجه المجموع عشان ماتفك وتخلينها لين تحمر وتقلبينها الصوب الثاني

وبعد ما يحمر الوجهين تحطينها فوق ورق النشاف عشان تسحب الزيت

والحشوة قبل ما انسى ^-^

لحم مفروم واحد

طماطه وحده مفرومه ناعم

بصله مفرومه ناعم

فلفل رومي مفروم

نخلطهم ونحط بهارات واذا حاره يصير احلا

وملح وبعد صلصة الصوياء

ونحطهم وسط العجينه

وبعد حلوه حشوة الخضار شهيه