الجمعة، 31 أغسطس، 2012

القادم احلا

حبايب قلبي يسعدني تواجدكم وهذا شرف ودعم كبير لي
مواضيعي الجايه 
عندك طماط كثير وخايفه يخرب لا تحتارين عندي الحل 0-0؟؟؟؟؟؟؟؟؟؟
ربيان مع صوص جديد وغريب مع دبس التمر عجيب صح ؟؟؟؟؟؟؟؟؟؟؟؟؟؟؟؟
لا تبعدون عيونكم عن البلوق فيه خبايا واسرار في جعبتي كثيره
وقبل ما يروح عن بالي
اشكر كل شخص من امريكا
       والكويت الحبيبه والامارات الغاليه والسعوديه بعد روحي
 مشكورين حبايبي 

شورمه حلوه

الشورمه 
الاكله هذي تعددت طرقها واكيد مافيه احلا من المطاعم بس تدرون عن بلاوي المطاعم 
عشان كذا الشخص يسويها في البيت احلا واطعم 
والحين بعطيكم طريقه اخذتها من سوريه دقت على ولده في قناة بداية وعطته الطريقه
سراحه حلوه حيل وتسلم يدين الي اخترعتها
انا جربت طرق كثيره بس هذي احلا واطعم شي
فيه طريقة الدجاج المسحب بعدين نحطه في قدر ونحط في النص صحن زيت وداخله فحم ونسكر القدر عشان تطلع نكهت 
المدخن بس ما اعجبتني انا شفتها في اقلاع
المهم بلا سوالف وقرقه
نبدي في الخطوه الاولى وهي صدور دجاج نقطعها صغار
بعدين نشوحهم في مقلاه وبعدها نحط البهارات ونشوحوبعدها نقطع البصل شرائح ونحطهم مع الدجاج ونحرك
لحد ما يستوي الدجاج








الخطوه الي بعدها نجهز هرده او طحنيه سايله ومايونيز ونحركهم ونسكبهم فوق الدجاج
ونقلي بطاط ونحطه فوق الدجاج ونحرك
اخر خطوه مخلل خيار وخس نقصصهم ونحشي الخبز او الفطاير او السندويش او خبز مسح انتي وذوقك 
انا كنت مستعجله وحطيت خبز لبناني
سامحون على التصوير الزفت بس الاهل جوعانين وانا اطقطق في الكامره






وبالعافيه على قلوبك
اي سؤال انا جهازه للرد عليكم

شوربة العدس



صباح الخير مساء الخير
نجدد اللقاء بكم
اليوم بنزل اشيائي القديمه
انا الان مسافره وفي السيارة واكتب لكم في اناملي الذهبيه ههههههههه واثقه
المهم شفت اكلات قديمه مصورتها وما نزلتها عشان الوقت
اول شي شوربة العدس نحبها ودايم امي تسويها بس انا مغيره فيها
اول شي نجيب العدس ونحطه في ماء يطبخ لحد ما يذوب انا ما احب اطحن العدس بعد طبخه
في كثير يطحنونه انا اخليه يطبخ لين يذوب بس انتبهي للعدس يكون نوعيه زينه
انا استخدمه حبته صغير وتكون لونها مايل للأحمر
بعد ما نطبخ العدس

نجيب بقدونس وجزر وبصل ونفرمهم  صغار ونشوحهم مع زيت في قدر

بعدها نحط شوربة ماجي ونشوحه معهم

وبعده نحط العدس  والبهارات والملح  والاجي وماء ساخن ونخليه يطبخ عشر دقايق



 ونقدمه
وفي الهناء والعافيه  

حلويات رمضان

ام ريان مثل العاده مبدعه
انا قاعده اتكلم عن مدونتي وان عدد الزوار مشاء الله يكثر قالت انا مصوره حلوياتي في رمضان
اعطيك قلت وانا اقدر اقول لا سراحه اختي فنانه في الحلويات وشغلها مرتب
راح انزل الحلويات بس بدون طرق الا البسبوسه وحلا الجلكسي مكتوب باليد ههههههههههه
عجزانه اكتبه في الكيبورد




 الطريقه كل سطر يتكلم عن طبقه الكيك الطبقه الي تحت بعدين النسله والجبن في الخلاط والخلطه االاخيره
جلكسي والقشطه

وفي الهناء والعافيه واي سؤال انا جاهزه اجاوبكم

الخميس، 30 أغسطس، 2012

اخر الليل


اخر الليل كنت بصوم وابي سحور مفيد سريع  و بيني وبينكم ابي شي سريع 
ولقيت فطاير تاكو قلت يبيلها دجاج ذوبي ومدري وش سالفه وزحمه 











وخطر في بالي حشوه سريعه ومفيده انا جسمي يحتاج الفواكه والاسماك والالبان ومشكلتي كل الاشياء الثلاثه
مو صحبه معها مدري ليش الفواكه اذا اكلتها يوم خليتها سنه نشتريها زيه في الثلاجه والالبان مو ذاك احب الببسي اكثر
والاسماك توني باديه اعود نفسي عليها 
المهم  جبت صحن و حطيت فيه زيتون وفطر و فلفل رومي و تونه (وقليت بطاط و  باذنجان شرائح) وخلطتهم وحطيت معهم خل بلسمك وصوص مدري شنو اسمه بس لما شفت فيه اوميغا 3 استنست وقلت بعد مفيد
شوفو شكله الاحمر عادي مافيه فايده بس نكهه المفيد الاخضر 
وهذا شكل الحشوه ولا تنسون جبن موزرلا وبارميزان وشيدر للنكهه وعشان الحشوه تماسك
وبعدها نحشي التاكو
ونصفه في الصينيه
وندخله الفرن لحد ما يحمر شوي والجبن يسيح

وهذا شكله بعد ما طلعته من الفرن وسراحه لما اكلته ما حسيت في طعمت التونه والمره الجايه ما راح احط بطاط مقلي عشان يصير مفيد اكثر وعشان ادلل نفسي سويت صحن سلطة جنبها

جربوها ما راح تندمون

الأربعاء، 29 أغسطس، 2012

لمستك السحريه

صنع ايدي اول شي هو مو اختراع بس لمسه من ايدك تعطي جمال خاص
اول شي جبت علبه فاضيه ولازم تكون شفافه
وعبتها حجر و كرستال 
وخليتها استاند لفرشيات المكياج اتمنى تعجبكم


السعر العلبه خمسه ريال والحجر اتوقع عشره يعني احلا استاند ولمستك السحريه على التسريحه اتمنى تعجبكم

تجربة ميمو من body shop

هاي اخباركم بنات 
اليوم بتكلم عن حبيب البنات  Body Shop
 انا احب المحل هذا كثير بس المشكله اذا دخلتيه اخذتي الي تبغيه ولي ماله اي داعي
انا شريت منه شامبو العسل مع البلسم وفادني كثير عشان شعري صار تعبان من الغده
وكنت صابغه شعري اشقر وبعد فتره صبغت شعري اسود في صبغت كوليستون ويلا بسراحه الصبغه هذي اعدمت  شعري
ما ادري كيف غامرت وجربتها المهم رحت ل بودي شوب وشريت شامبو لشعر المصبوغ مع بلسم وكريم انا ماجربته لحد الان بس اذا فادني راح اكتب لكم مره ثانيه
(وراح اكتب الان  ايش الي فادني من بودي شوب وايش الي ما عطاني اي نتيجه)

          هذا قشي هههههه وراح اتكلم عن كل صنف لحاله
 اول شي احب عطر الكرز الياباني صح ما يثبت معك بس حلو وصغنون وشكله كيوت وريحته ناعمه 
حلو في فترت الصيف لأن الصيف يبيله شي هادي سعره 117 ريال
 الكريم هذا لليدين والقدمين حلو حيل وفادني انا في رمضان كنت اسوي الفطاير كل يوم 
يديني تغير لونهم في 15 رمضان
قالت اختي يدينك تغيرو المهم رحت ل بودي شوب وقعد صاحب المحل يمدحه قلت اوكيه استخدمته للعيد يديني تغيرو ورجعو للونهم الأصلي يعني انصحكم فيه بعدين ريحته خفيفه وحلوه ماراح تزعجك اتوقع لأنه معالج مو كريم معطر لليدين مو عارفه سعره بس اتوقع بحدود 60 ريال
 شامبو وبلسم للشعر المصبوغ انا لحد الأن ما استخدمته اختي عجبها على شعرها انا استخدمت شامبو العسل وبلسمه للشعر الجاف
وحيل فادني وبعد فتره راح ابدي في هذا مو عارفه سعره
 غسول الوجه حلو حيل هو رغوه انا استخدمه واستخدم نيتروجينا كلهم نفس الفايده بس رغوة بودي شوب سعرها اعلاء من نيتروجينا وسعرها 99 ريال
 كريم للشعر المصبوغ حلوه بس مو عارفه سعرها
 اما هذا الداهيه ما حبيته تصدقون صرت استخدمه لطاولتي ما يفيد كلش كاتبين عليها انها تشيل الرواسب الي على الوجه ومناسب للبشره المصابه في البثور بس كلش ما اعجبتني انا استخدمت كثير بس في المرتبه الاولى مناديل جونسن
سعر مناديل بودي شوب 22 ريال
هذي التحفه الفنيه سراحه تخلي الكوعه والركب يلقون لأنها تشيل الجلد الميت و بعد ما تنسفرين جسمك لاتنسين كريم مرطب
سعرها حدود العشرين

هذا قناع وجه حلو كثير انا استخدمه من فتره لثانيه كل ماحسيت ان وجهي يبيله تنظيف استخدمته
انصحكم فيه وسعره جدااا معقول 56 ريال والكميه كبيره وتطول معك



 الصغنون هذا ما عجبني كلش هو مرطب للبشره بس سراحه ولا شي وما انصح فيه
سعره 49 ريال
وبس خلصت وتعبت من الكتابه 
اتمنى افيدكم لو في القليل ومشكورين على زيارتك صفحتي


الثلاثاء، 28 أغسطس، 2012

ما انصح ابد فيه

انا من الاشخاص مدمنين مجلات والمشكله اصدق كل شي
شريت المجله وشفت الظل او الشدو المهم اعجبني وطريقته حلوه وسهله اللون البيج تحت الحاجب واللون الاخضر الفاتح 
على الجفن المتحرك والاخضر الزيتي على زاويت العين والعلبه اعجبتني صغنونه تحطينها معك في الشنطه
قلت لازم اروح سنتر بوينت واخذته بس ندمت الالوان باهته حيل ماعدا البيج حلو 
والماركه هي rimmel
صورت المجله مع الشدو حقي
بس نصيحه فيه انواع ثانيه احلا وارخص انا ما اتذكر كم شريته بس سراحه ماعجبني

ميمو غيرت الروتين

مرحبا حبايبي 
اليوم وانا ارتب المكياج حقي لاحظت فيه اشياء كثيره احبها واشياء ما تمنيت اشتريها
قلت ليش ما اغير في المدونه بدال ما تكون رتم معين يكون فيها تغير واتواصل معكم بشكل دائم
اول شي راح اتكلم عن البودره المضغوطه 
انا شريت اشياء كثيره وبعض الأوقات ما استخدمها اصلن لأن بعض الكريمات تغنيك عنها 
بس مع الوقت صرت احبها حيل وما اقدر استغني عنها احس لمسه سحريه تعطيك رونق خاص
البودره الي شريتها اخذتها من نكتار بس طحت عليها سراحه حلوه حيل وكثير يقولون فيها لمعه لا تخفون اللمعه شوي وتروح
وبعدين للمناسبات رهيبه 
اسمها compact powder
من ماركت natural touch
ما اتذكر كم سعرها بس اتوقع بحدود 60 ريال


هذا شكلها اتمنى انكم تجربونها وتعجبكم مثل ما اعجبتني 
وانا شريت قلوس وروجين من نفس الماركه حلوين بس مو حيل يعني لونهم حق فترت الصبح للجامعه وانا كل طلعاتي في الليل يعني ما استعملهم دايم بس حطيت الوردي في شنطتي وقت العازه